سنين طويلة موجوع
ولا متشاف ولا مسموع
فقدان جزئي للنطق
فقدان كلي للحياة
اللي عاش عمر مسجون
مش هيستوعب بسهولة النجاة
أعذروني على أي كلمة غريبة أو تعبير
أي تجاهل أو تصرف محتاج تفسير
جايز كلامي يكون غريب
جايز إحساسي يبان أغرب
بس الحب على قد ما بيبان بسيط
إلا أنه بيشفي وبيداوي
وبيرد الأمان للمتغرب
حبيتكم أكتر من أي حد عرفته
سنين من الوحدة
كأن النبض كان واقف
ومعاكم أول نفس اتنفسته
كنت بفرح لفرحكم
وبتألم بألمكم
أي مكروه كان بيصيبكم
كان بيسيب فيا علامة
وكأن وجودي صدى لوجودكم
فاتت شهور
البعد بيعرفنا قيمة القرب
الفراق
هو اللي بيحسسنا بطعم الحب
الحياة جميلة
حقيقي مكنتش أعرف
الحب حلو
يلهوي لازم اتصرف
أصلي أتعودت أخاف م الفرح
وأهرب
بس المرة دي
قررت أجرب
فاتت شهور
بتمنى نتجمع من تاني
أوعدوني بالمحبة
أوعدوني بالوصال
وأنا بتمنالكم
من كل قلبي
أجمل الأماني
تمت.
جميع نصوص هذه المدونة مسجلة في إدارة حقوق المؤلف، ويحظر نشرها أو استخدامها دون إذن مؤلفها.