في تيار الفكر غرقان
وساوس سودا بتاخدني بعيد
أبعد مما عقل يتصور
بنسى ساعتها إزاي الإنسان بيكون سعيد
بشتاق للحظة صفا
بحاول أصحي قلب اتطفى
وعقل رافض يشوف
السواد بيحاوطني
بيعتصرني
بتلمس طريق للحب ف ضل الخوف
ولكن ولكن ولكن
الضلمة قوية
مالية المكان حواليا
الأرض بتتمايل بيا
السقف بيقرب عليا
الحيطان بتطول
بنضغط رغم البراح
بتخنق بارتياح
جوايا زلزال بيثور
زي البركان بيعصف
زي العاصفة بيدور
جوايا صوت بيقولي
موجة وهتعدي
وهترجع من تاني تحس
وهترجع من تاني تتنفس
وهترجع من تاني تدوق
طعم الحياة وتتونس
بصحبتك لنفسك
ولغيرك لما يعود
يزورك ويودك
ويفضل جمبك موجود
بتمنى أفضل مبسوط
بتمنى الفرح يفضل
مش بحلم أبقى بيرفكت
بحلم أكون موجود
من غير تقلبات
مزاجي يبقى هادي
من غير تغيرات
تاخدني لتحت الأرض
وتنتر بيا لفوق
بحلم أعيش ع السطح
مش ف القمة
ومش ف السفح
بحلم أكون موجود
مش أكتر من موجود
مش حاضر متألق
ولا غايب حد الجمود
بحلم أكون موجود
بس أكون موجود
تمت.
جميع نصوص المدونة مسجلة لدى إدارة حقوق المؤلف، ويحظر نشرها أو استخدامها دون إذن مؤلفها.